انا اسمى سامى لما كان عندى 12 سنة يعنى لما كنت فى 6 ابتدائي كان معانا فى الفصل واحد صاحبنا ابوه بيشتغل ف السعودية وجابله (مَقلَّمة) تحفة مفيش حد من الفصل مكنش نفسه فيها لدرجة إن صاحبنا اتسمى (أبو مَقلمة)، المهم صاحبنا كان عايز يبيع المقلمة عشان عنده واحدة غيرها، والفصل كله كان عايز يشتريها بس محدش موافق بالسعر اللى قالوا صاحبنا .
هو كان عايز يبيعها ب30 جنية واكتر سعر اتعرض عليه كان 20 جنية وبالتقسيط كمان، وطبعاً انا كنت من ضمن الناس اللي عايزين المقلمة بأي تمن.
وقتها قعدت يوم كامل افكر ف خطة ازاي استحوذ على المقلمة وفعلاً لقيت خطة مش بس هتخليني اشتريها، لكن كمان هشتريها ببلاش وهاخد فلوس كمان عليها 😊
تاني يوم رحت لصاحبي (ابو مقلمة) وقولتله هبيعلك المقلمة بالسعر الي انت عايزه واكتر كمان بس كل جنية فوق ال30 جنية بتوعك هنصص معاك فيه، امين؟ بصلّي باستغراب وقالي ماشي هتعمل ايه ؟
وقتها كان فيه حاجة منتشرة ف كانتين المدرسة تقريباً إسمها (البَختْ) ودي عبارة عن ظرف صغير مقفول بتشتريه بربع جنية بيبقا فيه رقم ممكن تكسب بيه هدية معينة عامل زي اليانصيب كدة ومن هنا لقيت الفكرة.
قولت لصاحبي يجيب 100 ورقة صغيرة نفس الحجم والشكل واللون، وبرطمان صغير تاني يوم المدرسة، وفعلاً جابهم، بعدها فهمته هيعمل اي، والخطة بدأت!
في أخر الحصة الرابعة وقبل الفسحة (عشان العيال متكونش لسة ضيعت مصروفها) طلع صاحبنا (ابو مقلمة) ع السبورة وحط مقلمته الجميلة قدامه عشان يغري بيها العيال وقال: "انا كنت عايز ابيعها ب25 جنية بس دلوقتي تقدر تاخدها ببلاش لو كسبت" العيال كلهم اتحمسوا، وقالوا نكسب ايه ؟
كمّل صاحبي وقال :" كل الي عليكم تكتبوا اسمكم ع ورقة من دول وهنعمل سحب والي يكسب هياخدها، بس عشان تخش السحب هتدفع جنية واحد وممكن تخش ب اكتر من اسم"
فصلنا كان فيه 64، غاب منهم 5 ونزل الفسحة حوالي 11والي اتبقوا ف الفصل ف حدود 48 كل واحد فيهم بدأ يطلع الجنية بتاعه وفيه عيال برجوازيين وارستقراطيين دخلوا ب 2 و 3 جنية بحالهم وفى عيال مدخلوش السحب ! كل ده وانا قاعد اراقب في صمت ومحدش يعرف اني اللى ورا الخطة دي كلها وده كان شرطى لصاحبى .
طبعاً انا اتفقت مع (حموكشة) فتوة الفصل مقابل كيس كراتية كلبظ و10 بليات دوكش صيني و25 سفروت علشان هو الي يلم الفلوس ويسحب الورقة الي عليها اسم الفايز عشان محدش من العيال كان هيعرف يعترض ويقوله تلت التلاتة كام 💪
دخل البرطمان 54 ورقة يعني لمينا 54 جنية وانا كنت الاسم ال55 بس انا VIP مينفعش اخش البرطمان زي الباقي.
وفعلاً بدأ حموكشة يرج البرطمان وهو واقف ع التختة عشان يختار الورقة الي هتكسب الجائزة الكبرى وهووب سحب الورقة وظهرت المفاجأة الاسم الفايز هو اسمي!
قومت من وسط الحضور رقصت وصيحت وعملت نفسي متفاجيء يعني وسط نظرات السخط والكراهية من اصحابي والي كانوا شوية وهيعملوا ثورة بس الي منعهم ان محدش كان عارف ان الخطة دي كلها بتعتي وان انا اللى ورا حوار البيع ده كله زي ما شرطت ع صاحبي ابو مقلمة، وطبعاً عشان حموكشة كان موجود.
جرس الحصة الخامسة ونهاية الفسحة ضرب وجرس السادسة والسابعة لحد ما اليوم خلص وجي وقت التقسيم. اتجمعت انا وابو مقلمة -السابق- وحموكشة ع الكورنيش وقعدنا.
حموكشة كان معاه ال54 جنية، انا معايا المقلمة، وصاحبي معاه ربنا ووعدي اني هرجعله الفلوس وطول اليوم وهو سرحان وقاعد يفكر ازاي انا الي كسبت من ال55 الي دخلوا القرعة.
اديته ال30 جنية بتوعه وقولتله كدة فاضل 24 جنية زي ما اتفقنا بالنص انا وانت بس قبل ما نقسم ال24 بالنص هندي حموكشة ال10 جنية بتعته! قالي بتاعت اي؟! رديت: اصلي اتفقت معاه يخبي الورقة الي فيها اسمي ف ايده ولما يجي يسحب يعمل نفسه بيسحب من البرطمان بس هو ف الحقيقة ماسك ورقتي وهينادم عليها مقابل ال10 جنية.
وبكدة خلص اليوم وانا معايا المقلمة و6 جنية بعد ما صاحبي خد ال6 التانية وكل ده من غير ما أدفع ولا قرش ..
